PS 83:1 O Perëndi, mos rri në heshtje! Mos mbyll gojën, mos rri i qetë, o Perëndi!
PS 83:2 Sepse, ja, armiqtë e tu po ziejnë dhe ata që të urrejnë ngrenë kokën.
PS 83:3 Thurrin gracka kundër popullit tënd dhe bëjnë komplote kundër atyre që ti mbron.
PS 83:4 Ata thonë: "Ejani t'i shkatërrojmë si komb, emri i Izraelit të mos kujtohet më".
PS 83:5 Sepse kanë komplotuar së bashku me një mendje dhe kanë lidhur një besëlidhje kundër teje.
PS 83:6 Çadrat e Edomit dhe Ismaelitët, Moabi dhe Hagarenët,
PS 83:7 Gebali, Amoni dhe Amaleku, Filistia me banorët e Tiros;
PS 83:8 dhe Asiria është bashkuar me ta për të ndihmuar bijtë e Lotit. (Sela)
PS 83:9 Vepro me ta ashtu si bëre me Madianin, me Siseran dhe me Jabinin pranë përroit të Kishonit,
PS 83:10 të cilët u shkatërruan në Endor dhe u bënë si pleh për tokën.
PS 83:11 Bëj që krerët e tyre të jenë si Orebi dhe Zeebi, dhe tërë princat e tyre si Zebahu dhe Tsalmuna,
PS 83:12 sepse ata thanë: "Të shtiem në dorë kullotat e Perëndisë".
PS 83:13 O Perëndia im, bëji njëlloj si pluhuri i vorbullës, si kashta në mëshirë të erës.
PS 83:14 Ashtu si zjarri djeg pyllin dhe flaka gllabëron malet,
PS 83:15 kështu ndiqi me furtunën tënde dhe trëmbi me uraganin tënd.
PS 83:16 Mbulo fytyrat e tyre me turp, me qëllim që të kërkojnë emrin tënd, o Zot.
PS 83:17 U turpërofshin dhe u tmerrofshin përjetë, u ngatërrofshin dhe vdekshin;
PS 83:18 dhe ta dijnë se ti vetëm, që quhesh Zoti, je Shumë i Larti mbi gjithë dheun.
Created with HTMLCompiler by BibleDatabase