Main Index: Albanian Bible UTF8

 

Proverbs 6

[1] [2] [3] [4] [5] [6] [7] [8] [9] [10] [11] [12] [13] [14] [15] [16] [17] [18] [19] [20] [21] [22] [23] [24] [25] [26] [27] [28] [29] [30] [31]

PROV 6:1 Biri im, në qoftë se je bërë garant për të afërmin tënd, në rast se ke dhënë dorën si garanci për një të huaj,

PROV 6:2 je zënë në lakun e fjalëve të gojës sate, je zënë nga fjalët e gojës sate.

PROV 6:3 Bëj këtë, pra, biri im, dhe shpengohu, sepse ke rënë në duart e të afërmit tënd. Shko, hidhu në këmbët e tij dhe ngul këmbë me të madhe te i afërmi yt.

PROV 6:4 Mos u jep gjumë syve të tu as çlodhje qepallave të tua;

PROV 6:5 çlirohu si gazela nga dora e gjahtarit, si zogu nga dora e atij që kap zogjtë.

PROV 6:6 Shko te milingona, o përtac, vër re zakonet e saj dhe bëhu i urtë.

PROV 6:7 Ajo nuk ka as kryetar, as mbikëqyrës, as zot;

PROV 6:8 e gjen ushqimin në verë dhe mbledh zahirenë e saj gjatë korrjes.

PROV 6:9 Deri kur, o përtac, do të rrish duke fjetur? Kur do të shkundesh nga gjumi yt?

PROV 6:10 Të flesh pak, të dremitësh pak, të rrish me duar në ije për t'u çlodhur,

PROV 6:11 kështu varfëria jote do të vijë si një vjedhës, dhe skamja jote si një njeri i armatosur.

PROV 6:12 Njeriu pa vlerë, njeriu i keq, ecën me një gojë të çoroditur;

PROV 6:13 luan syrin, flet me këmbët, bën shenja me gishta;

PROV 6:14 ka ligësi në zemër, kurdis vazhdimisht të keqen dhe mbjell grindje.

PROV 6:15 Prandaj shkatërrimi i tij do të vijë papritur, në një çast do të shkatërrohet pa rrugëdalje tjetër.

PROV 6:16 Zoti i urren këto gjashtë gjëra, madje shtatë janë të neveritshme për të:

PROV 6:17 sytë krenare, gjuha gënjeshtare, duart që derdhin gjak të pafajshëm,

PROV 6:18 zemra që kurdis plane të këqija, këmbët që turren shpejt drejt së keqes,

PROV 6:19 dëshmitari i rremë që thotë gënjeshtra dhe ai që shtie grindje midis vëllezërve.

PROV 6:20 Biri im, ruaje urdhërimin e atit tënd dhe mos harro mësimet e nënës sate.

PROV 6:21 Mbaji vazhdimisht të lidhura në zemrën tënde dhe fiksoji rreth qafës sate.

PROV 6:22 Kur do të ecësh, do të të udhëheqin; kur të pushosh, do të të ruajnë; kur të zgjohesh, do të flasin me ty.

PROV 6:23 Sepse urdhërimi është një llambë, mësimi një dritë, dhe ndreqjet e mësimit janë rruga e jetës,

PROV 6:24 për të të mbrojtur nga gruaja e keqe, nga lajkat e gjuhës të gruas së huaj.

PROV 6:25 Mos dëshiro në zemrën tënde bukurinë e saj dhe mos u rrëmbe nga qepallat e saj.

PROV 6:26 Sepse për një prostitutë burri katandiset për një copë bukë, dhe gruaja e një tjetri gjuan shpirtin e vyer të një burri.

PROV 6:27 A mund të mbajë burri një zjarr në gji të tij pa djegur rrobat e trupit?

PROV 6:28 A mund të ecë burri mbi qymyr të ndezur pa djegur këmbët e tij?

PROV 6:29 Në këtë gjendje është ai që shkon tek gruaja e një tjetri; kush e prek nuk do të mbetet pa u ndëshkuar.

PROV 6:30 Nuk përçmohet hajduti që vjedh për të shuar urinë kur është i uritur;

PROV 6:31 por në rast se kapet në faj, duhet të kthejë shtatëfishin, dhe të japë tërë pasurinë e shtëpisë së tij.

PROV 6:32 Por ai që kryen një shkelje kurore me një grua është një njeri pa mend; ai që bën një gjë të tillë shkatërron jetën e tij.

PROV 6:33 Do të gjejë plagë dhe përçmim, dhe turpi i tij nuk do t'i hiqet kurrë.

PROV 6:34 sepse xhelozia e tërbon bashkëshortin, që do të jetë i pamëshirshëm ditën e hakmarrjes.

PROV 6:35 Ai nuk do të pranojë asnjë shpërblim dhe nuk do të kënaqet, edhe sikur t'i bëjnë shumë dhurata.

 

Created with HTMLCompiler by BibleDatabase