2SAM 22:1 Davidi i drejtoi Zotit fjalët e këtij kantiku ditën që Zoti e çliroi nga duart e të gjithë armiqve të tij dhe nga dora e Saulit. Ai tha:
2SAM 22:2 "Zoti është fortesa ime, kalaja ime dhe çlirimtari im,
2SAM 22:3 Perëndia im, shkëmbi në të cilin strehohem, mburoja ime, fuqia e shpëtimit tim, strehimi im i lartë, streha ime. O shpëtimtari im, ti më shpëton nga dhuna!
2SAM 22:4 Unë i kërkoj ndihmë Zotit që meriton të lavdërohet, dhe kështu më shpëtoi nga duart e armiqve të mi.
2SAM 22:5 Valët e vdekjes më kishin rrethuar dhe përrenjtë e shkatërrimit më kishin tmerruar.
2SAM 22:6 Dhimbjet e Sheolit më kishin zënë dhe lakun e vdekjes e kisha para syve.
2SAM 22:7 Në ankthin tim i kërkova ndihmë Zotit dhe i klitha Perëndisë tim. Ai e dëgjoi zërin tim nga tempulli ku ndodhej dhe klithma ime arriti në veshët e tij.
2SAM 22:8 Atëherë toka u trondit dhe u drodh, themelet e qiejve u lëkundën dhe u shkundën, sepse ai ishte tërë zemërim.
2SAM 22:9 Një tym ngjitej nga fejzat e hundës së tij dhe një zjarr përvëlues i dilte nga goja; prej tij dilnin thëngjij.
2SAM 22:10 Ai i uli qiejtë dhe zbriti me një mjegull të dendur poshtë këmbëve të tij.
2SAM 22:11 Ai rrinte kaluar mbi një kerubin, fluturonte dhe dukej mbi flatrat e erës.
2SAM 22:12 Si shatorre rreth vetes kishte vënë terrin, errësirën e ujërave dhe retë e dendura të qiellit.
2SAM 22:13 Nga shkëlqimi që i priste dilnin thëngjij.
2SAM 22:14 Zoti gjëmoi në qiejt dhe Më i Larti bëri të dëgjohet zëri i tij.
2SAM 22:15 Hodhi shigjeta dhe shpërndau armiqtë, hodhi shigjetat e tij dhe i shpërndau.
2SAM 22:16 Atëherë doli shtrati i detit dhe themelet e botës u zbuluan, me qortimin e Zotit, me erën që shfrynë, fejzat e hundës së tij.
2SAM 22:17 Ai nga lart shtriu dorën dhe më kapi, më nxori nga ujërat e mëdha.
2SAM 22:18 Më çliroi nga armiku im i fuqishëm dhe nga ata që më urrenin, sepse ishin më të fortë se unë
2SAM 22:19 Ata ishin ngritur kundër meje ditën e mjerimit tim, por Zoti qe përkrahësi im,
2SAM 22:20 ai më çoi larg tyre; ai më shpëtoi sepse i pëlqej.
2SAM 22:21 Zoti më ka shpërblyer simbas së drejtës sime dhe më ka dhënë simbas pastërtisë së duarve të mia,
2SAM 22:22 sepse kam ndjekur rrugët e Zotit dhe nuk jam larguar pabesisht nga Perëndia im.
2SAM 22:23 Sepse kam mbajtur para vetes të gjitha ligjet e tij dhe nuk jam larguar nga statutet e tij.
2SAM 22:24 Kam qenë i ndershëm me të dhe i jam ruajtur paudhësisë.
2SAM 22:25 Prandaj Zoti më ka dhënë simbas së drejtës sime, simbas pastërtisë sime përpara syve të tij.
2SAM 22:26 Ti tregohesh i mëshirshëm me njeriun e përshpirtshëm dhe i drejtë me njeriun e drejtë;
2SAM 22:27 ti tregohesh i pastër me njeriun e pastër dhe dinak me njeriun e çoroditur.
2SAM 22:28 Ti shpëton njerëzit e hidhëruar, por shikimi yt ndalet mbi kryelartët për t'i ulur.
2SAM 22:29 Po, ti je drita ime, o Zot; Zoti ndriçon terrin tim.
2SAM 22:30 Me ty mund të sulmoj një grup, me Perëndinë tim mund të kapërcej një mur.
2SAM 22:31 Rruga e Zotit është e përsosur; fjala e Zotit është purifikuar me zjarrin. Ai është mburoja e të gjithë atyre që kanë shpresë tek ai.
2SAM 22:32 Në fakt kush është Perëndi përveç Zotit? Dhe kush është Kalaja përveç Perëndisë tonë?
2SAM 22:33 Zoti është kalaja ime e fuqishme, ai e bën të përsosur rrugën time.
2SAM 22:34 Ai i bën këmbët e mia si ato të drerit dhe më bën të mbahem mirë në vendet e mia të larta.
2SAM 22:35 Ai i mëson duart e mia për betejë dhe krahët e mia mund të tendosin një hark prej bronzi.
2SAM 22:36 Ti më ke dhënë edhe mburojën e shpëtimit tënd dhe mirësia jote më ka bërë të madh.
2SAM 22:37 Ti i ke zgjedhur hapat e mia dhe këmbët e mia nuk kanë ngurruar në këtë rast.
2SAM 22:38 Unë i kam ndjekur armiqtë e mi dhe i kam shkatërruar, nuk jam kthyer prapa para se t'i shfarosja.
2SAM 22:39 I kam shkatërruar dhe shtypur, dhe ata nuk kanë mundur më të ngrihen kundër meje; ata kanë rënë nën këmbët e mia.
2SAM 22:40 Ti më ke dhënë forcë në betejë, dhe bëre që të më përulen ata që ngriheshin kundër meje;
2SAM 22:41 bëre që të më kthenin kurrizin armiqtë e mi përpara meje, dhe unë zhduka ata që më urrenin.
2SAM 22:42 Ata shikuan, por nuk pati njeri që t'i shpëtonte; i klithën Zotit, por ai nuk iu përgjigj atyre.
2SAM 22:43 Unë i thërmova si pluhuri i tokës, i copëtova dhe i shkela si balta e rrugëve.
2SAM 22:44 Ti më ke çliruar nga mosmarrëveshjet e popullit tim, më ke ruajtur si udhëheqës i kombeve; një popull që nuk e njihja më ka shërbyer.
2SAM 22:45 Bijtë e të huajve më nënshtrohen mua; sa më dëgjojnë, më binden.
2SAM 22:46 Bijtë e të huajve kanë humbur guximin, kanë dalë duke u dridhur nga fortesat e tyre.
2SAM 22:47 Rroftë Zoti! Qoftë e bekuar Fortesa ime! U lartësoftë në qiell Perëndia, Fortesa e shpëtimit tim!
2SAM 22:48 Éshtë Perëndia që hakmerret për mua, që më nënshtron popujt,
2SAM 22:49 dhe më liron nga armiqtë e mi. Ti më larton mbi ata që ngrihen kundër meje dhe më çliron nga njeriu i furishëm.
2SAM 22:50 Prandaj, o Zot, do të të kremtoj midis kombeve dhe do të këndojë lavdinë e emrit tënd.
2SAM 22:51 Lirime të mëdha i siguron mbretit të tij, sillet dashamirës me të vajosurin, me Davidin dhe me pasardhësit e tij përjetë".
Created with HTMLCompiler by BibleDatabase